LAOAG CITY – Pinasingkedan ni Dr. Jose Orosa III, Medical Professional Staff iti Mariano Marcos Memorial Hospital and Medical Center iti ciudad ti Batac a manamnama a maipasdek iti kabiitan a panawen ti Regional Kidney Center ken Transplant Specialty Center iti Northern Luzon kas paset ti panagregget ti Department of Health iti asideg iti Dingras District Hospital.
Kinunana a mairingringpas ti maysa a katulagan iti lokal a gobierno ti Dingras para iti pannakausar ti nakurang a maysa nga ektaria a lote iti gobierno ken para iti konstruksion agingga iti uneg daytoy a tawen.
Inpakaammona a ditoy probinsia ti pangikabilanda iti 100 a hemo-dialysis units tapno agserbi kadagiti asideg nga ili ti Solsona, Marcos, Nueva Era, Kalinga, ken Apayao.
Segun ken ni Orosa, a PHP1.34 billion proposed eight-story ket addaan iti 100-bed capacity kidney center ken mangaramid iti kidney transplant ken kidney donation apaman nga ag-operate.
Inlawlawagna nga iti umad-adu a kaso ti sakit ti bato iti pagilian, ti nasao a proyekto ket saan laeng a makagunggona kadagiti umili ken kabangibang a probinsia no di ket ti pannakasanay dagiti dadduma a healthcare professionals tapno maparang-ay ti pannakaammo ken paglainganda ken agbalinda met nga espesialista.
