LAOAG CITY – Nagsagaba ti sugat iti rupa ti maysa a Mechanical Engineer kalpasan a maipagarup a dinanogdanog daytoy ti Criminologist ken Philippine National Police personnel iti Brgy. Bengcag ditoy siudad ti Laoag.
Segun iti biktima a ni Engr. Randel Tarampi nga agtawen ti 26 a residente iti nasao met laeng a barangay, naawis daytoy nga agatendar iti maysa a Birthday Party iti kasinsinna a maysa a pulis.
Inbatadna a nagsasangoda a nagiinom kaduana ti Criminologist ken Philippine National Police personnel agingga nga inuyaw ti Criminologist ti maysa a kasinsinna a lalaki.
Inlawlawagna nga idi damo ket saanna nga ingkankano ngem bayat a bumaybayag ket kumarkaro ti ibalbalikasna a pananguyaw iti kasinsinna agingga nga inanawana daytoy nga agsardeng nga aguyaw.
Nupay kasta, inpalgakna a saan latta daytoy a nagsardeng agingga a dinanog ti Criminologist isuna ken rimmaman met ti maysa a kameng ti pulisia a nangdanog pay kenkuana.
Gapu iti daytoy, kunana a naganawa ti kasinsinna a maysa met a pulis ngem nagsagaba daytoy ti sugat iti rupana ken sumagmamano a paset ti bagina.
Mainaig iti daytoy, kunana a basar iti resulta ti medical examination daytoy ket masapolna ti dumalan iti operasion gapu iti pannakadanog iti paset ti agongna.
Innayonna nga indanonna metten daytoy a pasamak iti kuerpo ti pulisia ditoy siudad ti Laoag tapno maikkan ti pagmennamennaan dagiti maseknan a nangdanogdanog kenkuana.
Naammoan a ti maseknan a pulis ket nakadestino iti Philippine National Police iti ili ti Paoay.
Kabayatanna, bayat a maisursurat daytoy a damag ket ikarkarigatan ti News Team ti Bombo Radyo Laoag nga alaen ti takder dagiti dua a maseknan maipapan iti nasao nga insidente.
