LAOAG CITY – Maisagsaganan ti maipila a reklamo kontra ti natliw a registered nurse iti naiwayat nga search operation iti pagtaengan na iti Brgy. 15 ditoy siudad ti Laoag.
Nabigbig ti suspek a ni Jemari Abad y Del Rosario, agtawen ti 25, volunteer nurse iti Laoag City General Hospital ken drug surenderer.
Iti naiwayat nga operasyon ket mainaig iti panagsalungasing iti RA 10591 wenno Comprehensive Laws on Firearms and Ammunition ken iti RA 9165 wenno Comprehensive Dangaerous Drugs Act of 2002.
Nakumpiskar dagiti otoridad ti innem nga empty shell ti kalibre 9mm, maysa a bala ti M16, innem a bala ti kalibre 9 mm, maysa a kalibre 22, lima a sachet a naglaon ti maipagarup a shabu, maysa a plastic nga addaan ti shabu residue, maysa a sachet a naglaon ti napagango a bulong ti marijuana ken maysa a container.
Segun kenni Abad, awan ti ammo na iti naiwayat nga operasyon ken saan na a kukua dagiti narekobre ti otoridad.
Inmatangan dagiti opisyal ti barangay, pakairamanan ti Bombo Radyo ti naiwayat nga search operation iti nasao a lugar.
Iti mainaig a damag
Kinumpirmaran ni SPO3 Harold Nicolas, nangidaulo ti search operation iti pagtaengan ti suspek a ni Jemari Abad iti Brgy. 15 ditoy siudad ti Laoag a ti suspek ket adda iti drug watchlist iti biang ti street level.
Kuna na nga maamuan da no adda iti nakairaman ti subject ti operasyon babaen ti custudial debriefing.
Segun kenni Nicolas, nagsurender ni Abad idi Hulyo 31, 2016.
Nupay kasta, inbatad na a saan a nagsardeng ni Abad iti trabaho na mainaig ti iligal a druga.
Innayon ni Nicolas nga aggapu iti probinsya ti Ilocos Sur dagiti iligal a druga a suplay ti suspek.
