LAOAG CITY – Naka-red alert ti Regional Disaster Risk Reduction and Management Council kagiddan ti iduduprak ti bagyo Nika.
Daytoy ti Inbatad ni Adreanne Pagsolingan, ti Information Officer ti Office of the Civil Defense – Region I apaman nga agtultuloy a makipagkomkomunikar da kadagiti nagduduma nga ili ditoy rehiyon para iti alalisto a tulong.
Inbatad ni Pagsolingan, umaboten iti 59 a pamilya ti apektado ken nagbakwit a pamilya gapu pay laeng ti iduduprak ti Bagyo Nika.
Dagiti nagbkwit ket manipud iti probinsya ti Ilocos Sur ken ditoy probinsya ti Ilocos Norte.
Kunana a passable met amin a national roads malaksid laeng ti national highway iti Sitio. Banquero iti Barangay Pancian iti ili ti Pagudpud a temporaryo a napaserraan idi rabii ken dagiti sumagmamano a local roads iti paset ti probinsya ken iti probinsya ti Ilocos Sur a saan a madalyasatan.
Kabayatanna, mangnamnama ni Pagsolingan a saan a kas iti naglabas a bagyo Marce ti agbalin nga epekto ti bagyo Nika.
Maipalagip nga adda 12,234 a pamilya a naapektaran gapu iti bagyo Marce.
