LAOAG CITY – Naipilan ti reklamo a grave threat iti piskalya kontra kada dati a Mayor Chevylle Fariñas, kenni ABC President Mikee Fariñas ditoy siudad ti Laoag.
Daytoy ket seknan iti maipagarup a saan a nasayaat ti panangtrato da kadagiti dua a katulong da a taga Cagayan.
Maipalagip a nagreklamo dagiti dua a katulong kontra kadagiti agina a Fariñas seknan iti saan a pannakaipaay ti sweldo da iti sumagmamano a bulan Hulyo 5, 2019.
Naikari kadakuada a masweldoan da ti lima a ribo a pisos iti kada bulan idi agserbi da iti pagtaengan dagiti agina a Fariñas.
Idi Disyembre 25, 2019, agarup ala-una ti parbangon ket nagdesisyon a pumanaw dagiti dua a katulong iti pagtaengan da.
Idi binirok dagiti agina, ket nabirokan da iti bypass road a sakop iti nasao a barangay ket dita a maipagarup a ginuyod ni ABC President Fariñas dagiti katulong a pinagsubli iti pagtaengan da.
Maipagarup met a tinungpa ni dati a Mayor Fariñas ken tinutukan na ti kutsulyo dagiti biktima idinto a maipagarup a tinutukan ti ubng a Fariñas ti maysa a klase ti paltog dagiti maseknan.
Dagiti katulong ket pagpada a babai nga agtawen ti 25 a residente iti Brgy. Amonitan, Gonzaga, Cagayan idinto ti agtawen ti 18 ket residente iti San Vicente, Sta. Ana, Cagayan.
Awan pay ti sungbat dagiti agina a Fariñas iti reklamo kontra kadakuada.
