LAOAG CITY – Naipilan ti reklamo kas regular filing a qualified theft kontra iti maysa a babai nga agpapaay iti pawnshop ditoy ciudad ti Laoag.
Nabigbig daytoy a ni Retchille Gabat Cantaoi, addan iti umno a tawen, awanan asawa, ken residente iti Brgy. 2 Hilario iti ili ti Banna.
Ummuna iti daytoy, nagreport iti PNP Laoag ni Mervin Pascual Claveria, addan iti umno a tawen, awanan ti asawa, area supervisor ti maysa a pawnshop ken residente iti Brgy. Pantoc San Quintin, Abra.
Segun kenni Claveria, apaman ti panag-inventory na idi Pebrero 16 ket naduktalan na a dagiti nai-salda nga alahas ken computer laptops ket peke.
Gapu iti daytoy, nagimbestigar ni Claveria ken nakikoordinar kadagiti nakanagan a nangi-sangla kadagiti alahas ken laptops.
Nupay kasta, kuna na a naglikudan dagitoy nga awan ti ammo da iti nasao nga insidente.
Kabayatanna, umabot iti nasurok 62 a ribo ti balor dagiti peke nga alahas ken laptop a naipan iti pawnshop.
