LAOAG CITY – Linawlawagan ni Barangay Kagawad Joel Alcon iti Barangay Gabu Norte ditoy ciudad ti Laoag ti reklamo mainaig iti Ayuda para sa Kapos ang Kita Program (AKAP).
Segun kenni Alcon, saan laeng a dagiti solo parent ti benepisyaryo iti nadakamat a programa no diket nangkita da iti sabali a kwalipikado gapo adda dagiti solo parent a saan a nakaala kadagiti dokumento.
Inlawlawag na a kwalipikado amin dagiti 35 nga adda iti listaan da ken awan ti pilpilyen da nga agbalin a benipisyaryo gapo ta adda met dagiti nasken a suruten da a proseso.
Kunana pay a no adda ti maibunong nga ayuda ket maipakaammo a dagus ken uray first come first serve ket arisiten da met laeng daytoy.
Inbatad na pay a no nakumpleton ti listaan ket bagaan met dagiti opisyal ti barangay dagitoy nga isudan to met ti sumublat nga umawat.
Patien ni Alcon a ti namunganayan ti reklamo a saan a solo parent dagiti immawat ket ti panangpili da iti sabali nangruna ket adda dagiti nagsanod a solo parent gapo ta saan da a nakaala kadagiti kasapulan a dokumento kas iti cenomar ken dadduma pay.
Innayon na nga adda dagiti dadduma a tattao a kayat da ket isuda laeng ti agbalin a benepisyaryo ken daytoy ti saan a mabalin a masurot gapo ta adda ti proseso.
