LAOAG CITY – Inbatad ni ABC Federated President George Padre iti ili ti Bacarra a saan dan nga ituloy ti agimbestigar mainaig iti reklamo kontra ken ni Barangay capt. Derek Velasco iti Barangay Buyon iti nasao nga ili.
Daytoy ket mainaig iti cash advance ni Velasco a 330 ribo a pisos idi mayo ngem naibunong laeng idi Agosto.
Inlawlawag na a mangiyuswat da koman iti Committee hearing iti konseho ngem isu met ti panagsurat ni Mayor Fritzie dela Cruz – Gapasin iti DILG partikular ken ni Secretary Eduardo Año ken kiniddaw na ti panagimbestigar da mainaig iti daytoy a banag.
Innayon na a no isuna ti masurot ket agimbestigar latta tapno adda ti parallel investigation ti konseho ngem saannan nga intuloy tapno saan a makuriro ti imbestigasyon ken saan nga ibaga ni Velasco a mapulpulitiko daytoy.
Mainaig iti daytoy, inpakaammo ni Padre nga inaksyunan a dagus ti DILG ti surat ni Mayor Gapasin no sadinno nga inikkan da ni Barangay Capt. Velasco ti 30 nga aldaw nga agsungbat iti reklamo kontra kenkuana.
Innayon na nga adda ti fact-finding team ti DILG a Bantay Corruption nga agim-imbestigar iti daytoy a banag ken basar iti impormasyon na ket adda payen ti findings ken rekomendasyon.
Nupay kasta, saanna pay nga ammo ti linaon ti fact-finding report ti DILG gapu ta ti paylaeng mayor ti ayan ti kopya.
Inpakaammo ni Padre nga urayen da laeng ti resulta ti imbestigasyon ti DILG sakbay a pagtutulagan da ti sumaruno nga addang da.
Immuna a pinadas ti Bombo Radyo nga alaen ti komento ni Velasco ngem kiniddaw na nga umuna pay laeng a mainterview da Padre ken ni Mayor Gapasin sakbay nga agsarita mainaig iti reklamo kontra kenkuana.
