LAOAG CITY – Inadmitir ni Barangay Chairman Adelboy Quinto iti Barangay Caaoacan ditoy ciudad ti Laoag nga adda dagiti saan a mangalap a nagbalin a benipisyaryo ti ayuda a para kadagiti mangalap.
Inlawlawag na a dagiti kabagyan na a nagbalin a benipisyaryo ket immawat laeng iti maikadwa a bansada ti ayuda partikular ti tallo a ribo a pisos, bagas, itlog ken dadduma pay.
Naamoan a ti nagbalin a mandar ti City Agriculture Office kadakuada ket dagiti miembro iti Fisherfolks a saan pay a nakaawat ti SAP ken saan a miembro ti 4Ps dagiti rumbeng nga agbalin a benipisyaryo.
Segun kenni Quinto, ti kabagyan na nga immawat ti ayuda ket datin a miembro ti Fisherfolks.
Inpetteng na a dagiti mangalap a saan a benipisyaryo ti ayuda ket dagiti nakaawat ti SAP ken miembro ti 4Ps.
Kabayatanna, patien ti kapitan nga adda ti gura ti nagreklamo kenkuana ken atapen na nga adda ti pakainaigan na daytoy iti ummuna a reklamo iti barangay da kas iti ado a waterlilies iti karayan.
