LAOAG CITY – Ninigar dagiti pannakabagi ti Venvi Agro-Industrial Venture Corp. ti nagbalin a reklamo dagiti sumagmamano a residente iti Brgy. 21 iti ili ti San Nicolas seknan ti nabangsit nga aglawlaw gapu iti rugit ti baboy a maipaanod iti waig.
Inbatad ni Mr. Jonas Guitap ti Executive Assisant nga apaman a naawat da ti reklamo ket nagturong a mismo dagiti personahe ti kompanya iti nasao a waig tapno makita nu adda ti leak iti pagdalanan ti water waste.
Inbatad na nga awan ti nakita a leak ken awan ti naangot a nabangsit a danom manipod iti waig.
Miainigi ti daytoy, kuna na nga idi nabisita ti waig ket napark-atanen ti danom babaen iti mismo a kapitan ti nasao a barangay.
Inpakaammo ni Guitap a nu adda ti maiparuk-at a danom manipod iti water waste ti pagtaraknan ti baboy ket recycled ken treated daytoy.
Immuna iti daytoy, kuna ni Guitap nga iti upper stream ti nasao a waig ket adda ti brass dam a proyekto ti lokal a gobierno.
Kuna na nga iti ngatoen daytoy ket adda pay ti tallo a creek nga isu ti mangsupsuplay ti danom iti brass dam.
Mainaig iti daytoy, inbatad ni Guitap a nu man adda ti leakages ti kumpanya kadagiti pagdalanan ti waste water ket natarimaan itay napan a tawen.
Naamoan a ti maurnong a water waste manipod iti nasao a kompanya ket dakkel a makatulong kadagiti mannalon iti nasao a barangay.
Kabayatanna, inpetteng ni Brgy. Chairman Pete Duldulao iti Brgy. 21 iti ili ti San Nicolas nga agayumu-om ti nabangsit nga angot manipod iti waig.
Kuna na nga adda payen ti panagsakit ti buksit dagiti kabarangayanna gapu iti nabangsit a malanglang-ab dagitoy.
Inbatad na a gapu iti daytoy ket nalukatan ti brass dam tapno maes-essan ti panagayamu-om ti nabangsit nga angot.
Mainaig iti daytoy, inbunannag ni Duldulao a nabayagen nga adda ti leakage manipod iti pagpondoan ti waste water ti Venvi isut gapu na nga arig a maurnong iti brass dam ti nabangsit nga angot.
Kabayatanna, kuna ni kapitan Duldulao nga adda ti naala a sample ti danom manipod iti brass dam ken naited iti MENRO tapno dumalan iti testing.
