LAOAG CITY – Inyendorsar ni Vice Mayor Rey Carlos Fariñas iti Committee on Barangay Affairs ken Committee on Good Governance ti reklamo ni Ms. Evangeline Roqua iti Brgy. 55-B, Salet-Bulangon ditoy ciudad ti Laoag nga immunan a naidanun ditoy Bombo Radyo Laoag.
Segun ken ni Vice Mayor Fariñas, adda ti naawat na a surat mainaig iti maipagarup a saan a panangited ti kapitan ti barangay ti Certificate of Low Income ken ni Roqua.
Inlawlawag ti konseho a nakailanad iti paglintegan a saan a rumbeng a lumabes iti sangaribo a pisos ti maipataw a multa dagiti saan a tumulong nga agubra kangrunaan na ti panagdalos iti barangay.
Kuna pay ti konseho a no awan ti naipasa nga ordinansa mainaig iti daytoy ket saan a mabalin nga ipatungpal.
Maipalagip nga immunan nga inbatad ni Roqua a nakasagana nga agbayad ti sangaribo a pisos ngem maipagarup nga awan met iti ordinasa wenno resibo nga ited ti kapitan.
Inbatad na a kasapolan na iti certificate of low income gapu ta agpatulong daytoy iti opisina ni Congressman Sandro Marcos para iti pannakaopera ti mata iti asawa na.
Mainaig iti daytoy, inlawlawag ni Barangay Chairman Fernando Baracao iti Barangay 55, Salet-Bulangon ditoy ciudad ti Laoag a saanna nga ikkan ti certificate of Low Income ni Roqua gapu ta a saan da a kwalipikado.
Inpalgak ti kapitan a saan a karaman ti pamilya Roqua kadagiti maibilang a nakukurapay iti barangay da gapu ta adda ti bukod da a negosyo, nakagatang da ti brand new a lugan ken adda pay ti inauna nga anakna idiay Canada.
