LAOAG CITY – Impakaammo ni Ms. Maricel S. Caleja, Social Welfare Officer IV, iti Disaster Response Division nga amin a relief goods wenno food packs ket a maited kadagiti map-apektaran a pamilya ket nakabasar iti report ti local government units.
Kunana a dagiti relief packs nga augmentation kadagiti local government unit ket basar iti Republic Act 10121 wenno Phillipine Disaster Risk Reduction and Management Act of 2010.
Inlawlawag na a ti augmentation process ket manipud iti Local Social Welfare and Development Office nga addaan da met ti opisina kadagiti Local government Unit, no sadinno a dagiti listaan a maipaima kadakuada ket aggapo met laeng kadagiti barangay kapitan.
Innayonna a ti linaon ti tunggal karton ti family food packs ket aglaon ti innem a kilo ti bagas, uppat a lata ti corned beef, 2 a klase ti tuna, 2 a klase ti sardinas , 5 a pakete ti cereals.
Kunana nga agsinnabali ti linaon ti family food packs nga aggapo ti Department of Social Welfare and Development ken ti Municipal Social Welfare and Development, no sadinno a basbassit latta ti aggapo Municipal Social Welfare and Development.
Inpablaak ni Caleja a no adda da met dagiti isyu kas iti repacking kadagiti naipaima kadagiti lokal a gobierno a relief goods ket siguradwen ti ahensya ti Department of Social Welfare and Development Office ti ag-imbestigar ken agala ti impormasyon, sakbay da a mangipila iti kaso.
Inpetteng ni Caleja a saan a rumbeng a kutyen wenno maguddwa-gudwa dagiti relief goods sipod ta ti maysa a relief pack ket umdas laeng para iti maysa a pamilya.
Kunana a no man agkurang ket mabalin da agrequest manen ken agipasa ti augmentation report.
Mainaig iti daytoy, no adda man matakuatan ti opisina da a mangbing-bingay kadagiti relief goods ket mabalin da a mamulta ti 50,000 a pisos agingga 500,000 a pisos a nakalanad iti Republic Act 10121.
No met naikkan ti stickers kas ti rupa wenno nagan ti maysa a politiko ket mabalin da a maibalod iti innem a tawen ken maysa nga aldaw agingga 12 a tawen.
Kinumpirmaran ni Caleja a sipod idi tawen 2010 agingga iti agdama a tawen ket maysa pay laeng ti naireport seknan ti kastoy nga insidente nga isu ti isyu iti Barangay Nagpatpatan iti ili ti Solsona.
Kabayatanna, binallaagan ni Caleja ti publiko nangruna kadagiti adda takem na a no adda da isyu a nalukatan, nakurangan wenno aniaman nga isyu maipapan iti panagibunong ti relief packs ket ipadanon laeng iti Department of Social Welfare and Development Office wenno kadagiti Local Social Welfare Development Units
