LAOAG CITY – Awan ti malabsing a paglintegan dagiti nagduduma a religious organizations no agiyendorsar da ti kandidato kangrunaan na iti kina-presidente ken bise presidente iti May 9, 2022 elections.
Daytoy ti inbatad ni Prof. Karl Lenin Benigno, political analyst iti NorthWestern University (NWU) ditoy ciudad ti Laoag.
Inlawlawag na a napinpintas pay no makipagpaset ti religious sector iti eleksyon tapno ada-ado dagiti makipartisipar ken maipeksa da met ti kalikagom da iti gobierno.
Kabayatanna, binalakadan ni Benigno ti publiko a saan a basta mamati kadagiti maipopost iti social media wenno kadagiti peke nga impormasyon maipanggep kadagiti kandidato.
Innayon na a ti kasayaatan nga aramiden nga i-evaluate ti credentials wenno gagem dagiti kandidato wenno agtuturay babaen iti panangtingiting dagiti plataporma nga idasdasar da kadagiti tattao.
Inpalgak na pay a no awan ti maipresentar dagiti maseknan a plataporma da ket sigurado nga awan ti maipaay da a pagsayaatan ti umili no dagitoy ti mapagasatan a maelektaran.
