LAOAG CITY – “Congress-meow is back.”
Daytoy ti inpakaammo ni Cavite 4th District Rep. Kiko Barzaga kalpasan ti panaglippas ti 60 nga aldaw a pannakasuspensona a nangrugi idi Disiembre 1, 2025.
Iti return speech daytoy nga in-post-na iti official Facebook page-na, inpasigurado ni Barzaga ti panangilungalong kadagiti napapateg a gakat a direkta a pakabenepisiaran dagiti Pilipino.
Karaman kadagiti gakat a tutukanna ti VAT Abolition Bill, Absolute Divorce Bill, Travel Disclosure Bill a mangobligar kadagiti opisial ti gobierno nga ipublikar ti detalye dagiti biaheda iti sabali a pagilian kasta met ti gakat nga adjustments iti national minimum wage ken provincial rates.
Kinumpirmaran ni House Committee on Ethics and Privileges Chair ken 4Ps Party-list Rep. JC Abalos a pormalen a nagngudo ti pannakasuspenso ni Barzaga.
Nupay kasta, ita nga aldaw ket maminsan manen a mangisayangkat ti panagdengngeg ti komite maiyallubog iti inaprobaran a mosion iti plenario mainaig iti privilege speech ni Manila Rep. Rolando Valeriano nga agkidkiddaw a patawan manen ti suspenso ni Barzaga gapu iti maipagarup a panaglabsing kadagiti kondision ti Ethics Committee.
