LAOAG CITY – Nakunbiktaran iti Tagum, Davao del Norte ti pannusa a pannakaibalud da ACT Teachers party-list Rep. France Castro ken dati a Bayan Muna party-list Rep. Satur Ocampo.
Dumanon agingga iti innem a tawen ti naipataw a pannakaibalud kadakuada gapu iti maipagarup a pannakaikabil iti peggad kadagiti menor de edad idi Nobiembre 2018.
Iti maysa a 25 a panid ti desision, naduktalan ti Tagum Regional Trial Court Branch 2 nga adda ti nalabsing da Castro, Ocampo ken 11 a dadduma pay iti panagsalungasing iti Section 10 (a) ti Republic Act 7610 wenno ti Special Protection of Children Against Abuse, Exploitation, and Discrimination Act ket dagitoy ket napatawan a maibalud manaipud iti uppat a tawen agingga iti innem a tawen.
Inbilin ti Korte nga agbayadda ti 10 a ribu a pisos kas civil indemnity ken 10 a ribu a pisos kas moral damages iti kada menor de edad nga addaan ti interes nga innem a porsiento iti kada tawen manipud iti panagbalin a final ti desision agingga iti buo a panagbayad.
Mainaig iti daytoy, inabsuwelto ti Korte da Pastor Edgar Ugal, Rev. Ryan Magpayo, Eller Ordeniza ken Rev. Jurie Jaime gapu iti kinakurang ti prosekusion a paneknekanda ti naglabsinganda.
Kabayatanna, dagus met a kinontra ti kampo ni Castro ti nagbalin a desision ti Korte.
