LAOAG CITY – “He is in France.”
Daytoy ti inrakurak ni Department of Justice (DOJ) Secretary Jesus Crispin Remulla idi nasaludsod no sadinno iti agdama ni Ako Bicol Party-list Rep. Zaldy Co.
Maysa ni Co ti maitudtudo iti maanomalya ken palpak a flood control projects nga agbalor ti binilyon a pisos.
Kiddawen ti Department of Justice iti Interpol nga ikabil ni Co iti Blue Notice tapno mabantayan kabayatan nga adda iti ballasiw taaw.
Kinumpirmaran ti Department of Justice a 21 nga indibidual a pakairamanan dagiti senador, kongresista, dati a Department of Public Works and Highways (DPWH) officials ken contractor ti inrekomendar ti National Bureau of Investigation (NBI) a kasoan.
Nupay kasta, awan ditoy ni dati nga House Speaker Martin Romualdez a maysa kadagiti nadakamat ti nagtestigo iti Senate Blue Ribbon Committee a ni Orly Goteza.
Inlawlawag ni Remulla a saan a nagatendar ni Goteza iti Department of Justice isu a saanda a nakapagsarita mainaig iti nagbalin a salaysay daytoy.
Kiddawen ni Remulla iti Senado a palubosan iti mabiit nga agawid ti contractor a ni Curlee Discaya tapno alaen dagiti dokumento a kasapulan para iti ebidensia.
Kabayatanna, kunana a namnamaen nga adu pay ti nagan a mairaman iti isyu kadagiti sumarsaruno nga aldaw ken manamnama a mapilaan met ti maiyannatop a kaso.
