LAOAG CITY – Ginutigot ni dati nga Health secretary ken House Deputy Majority Leader Janette Garin dagiti nagannak nga ikkaten ti panagdudua iti panagbakuna dagiti annak.
Inaramid daytoy ti agpanpanday linteg kalpasan ti agtultuloy a panagngato ti kaso ti pertussis iti pagilian.
Basar iti report ti Department of Health (DOH), addan ti agarop 1,500 a kaso ti pertussis iti intero a pagilian sipud idi Enero 1 agingga iti Abril 6, 2024 no sadinno nga addan ti 63 a natay gapu iti nasao a sakit.
Inpaganetget ni Garin a ti vaccine hesitancy ti mangitunda iti agtultuloy a panagngato ti bilang ti kaso a pertussis ken kamuras iti pagilian.
Pinasagidan met ti kongresista dagiti dati a sekretaryo ti Department of Health gapu ta saanda a nalabanan ti panagwaras ti peke a damag kontra iti panagbakuna.
Mainaig iti daytoy, addda ti 3 a milyon a pentavalent wenno 5-in-1 vaccine doses ti namnamaen ti pagilian a sumangpet intono Hunyo ken iti agdama ket addan iti proseso iti panaggatang ti Diphtheria, Pertussis, ken Tetanus (DPT) doses.
