LAOAG CITY – Inkalintegan ni Tingog Party-list Rep. Jude Acidre ti maipagarup a ”bagman” ni Vice President Sara Duterte a ni Ramil Madriaga.
Inpettengna nga adda ti kinapudnona dagiti alegasion daytoy kontra ken ni Vice President Sara Duterte mainaig iti sangsangoen a reklamo nga impeachment.
Inbatadna a ti supplementary affidavit ni Madriaga ket detalyado ken narigat a partuaten gapu iti kinaadu dagiti indatagna nga impormasion.
Kunana a nalawag ken tuloy-tuloy ti salaysay ni Madriaga a mangipakpakita ti kinauneg ti ammo daytoy.
Inlawlawagna a direkta ti ammo ni Madriaga kadagiti maibagbaga a transaksion gapu ta maipagarup nga asideg isuna ken ni Vice President Sara ken iti amana a ni dati a Presidente Rodrigo Duterte.
Maipalagip a simmango ni Madriaga iti panagdengngeg ti House Committee on Justice idi Abril 14 no sadinno nga insubmitirna ti 24 a panid a sworn statement.
Nakailanad ditoy ti ad-adda a detalyado a bersion ti immuna nga affidavit a naiparuk-aten iti publiko iti napalabas a tawen.
Rumrummuar a nangipakita ni Madriaga kadagiti ebidensia kas kadagiti tseke ken ladawan tapno suportaran dagiti rakurakna.
Nupay kasta, kwinestionaran ti sumagmamano nga agpanpanday linteg ti kredibilidad ken motibo ni Madriaga gapu ta isuna ket agdama a nakabalud iti babaen ti Bureau of Jail Management and Penology iti Camp Bagong Diwa idiay Taguig.
