LAOAG CITY – Inpasigurado ni 4Ps Partylist Rep. JC Abalos, Chairman ti House Committee on Ethics and Privileges a maipaayan ti umdas a gundaway ni Cavite Rep. Kiko Barzaga tapno makaidasar ti depensa kadagiti baro a reklamo a sangsangwen na.
Naikeddeng nga agtataripnong ti komite iti sumaruno a lawas no sadinno a plano da nga imbitaran ni Barzaga ken dagiti complainants, nupay addan ti immuna a rakurak ti ubing nga agpanpanday linteg a saan nga agatendar iti panangpaawag kenkuana ti Ethics Committee.
Basar iti chairman ti komite, amin a miembro ken karaman iti isyu ket mapatuludan ti imbitasyon tapno pagsasaritaan da ti linaon ken kiddaw ni Manila Rep. Roland Valeriano iti plenaryo a patawan manen ti sabali a pannakasuspenso ti ubing a kongresista tapno masursurwan ti usto nga adal.
Sakbay a napatibker ti mosyon iti plenaryo mainaig iti balbaliw a panangpaawag ken ni Barzaga ti Ethics Committee ket timmakder ni Rizal Rep. Emigdio “Dino” Tanjuatco III kalpasan ni Valeriano a nangilungalong tapno dagiti baro a reklamo ket trataren ti komite.
Inpetteng ni Abalos a ti kastoy a panagdengngeg ken panagpaawag ti Ethics Committee ket mabalin met a maaramid iti siasinno man a miembro ti kababaan a pagpandayan linteg iti kongreso, depende iti kadagsen ti reklamo.
