LAOAG CITY – Inbutaktak ni Batangas 1st District Representative Leandro Leviste ti listaan ti 75 a proyekto ti Department of Public Works and Highways nga addaan ti pakabuklan a balor a P8 bilyon para iti 2025 National Expenditure Program (NEP) a naka-tag iti “OP (ES/SAP)” kas proponent kadagiti files ti pimmusay a ni Undersecretary Catalina Cabral.
Inbatad ni Leviste, agarup 60% kadagiti proyekto ket nakasentro iti flood control ken slope protection idinto a 40% met para kadagiti kalsada ken streetlight projects.
Dinakamat ti kongresista a saan pay a nalawag no asino ti dakdakamaten ti “OP (ES/SAP),” a kaarngi dagiti acronym para iti Office of the President, Executive Secretary ken Special Assistant to the President ken mabalin a mangitudtudo kadagiti opisina ken saan nga indibidual a tao.
Inlawlawagna a saan daytoy a ni dati nga Executive Secretary Lucas Bersamin a nangibaga nga awan ti pakainaiganda mainaig iti daytoy ken supsuportaranda ti imbestigasion tapno maammoan ti pudno a proponent.
Inpakita ni Leviste ti listaan kalpasan a nakaawat ti baro a kopya ti file manipud iti maysa a source a naggapu met iti Department of Public Works and Highways ken nakumpirmaran a tugma daytoy iti dadduma a kopya nga iggem dagiti ahensia kas ti Ombudsman, sumagmamano nga opisial pakairamanan ni Senate President Pro Tempore Ping Lacson ken media.
Mamati isuna a ti kasayaatan a ti Department of Public Works and Highways mismo ti mangiruar dagiti amin a files iti publiko tapno maalay-ayan dagiti sayangguseng ken makaipaay ti nalawag a palawag.
Inpetteng ni Leviste ti kadakkelan a proyekto iti listaan nga adda iti distritona ket ti P300-M streetlight project iti Tagaytay-Nasugbu Highway nga inpaay iti New Rich General Contractor Services & Trading Co. Inc. iti balor a P280.8-M.
Kunana a tunggal streetlight ket agbalor ti P233,624 isut gapuna a maibilang daytoy a maysa kadagiti overpriced a proyekto idiay Batangas.
Inpettengna nga iti baet a kasapulan dagiti nasao a proyekto kas ti streetlights ngem nasaysayaat koma a saan unay a kastoy ti kanginana.
Nagpanawagan ni Leviste iti publiko nga usaren ti listaan tapno mangiwayat ti bukud a panangtingiting ken suportaran ti posible nga imbestigasion ti Senado ken Kongreso inton 2026.
