LAOAG CITY – Inbutaktak ni House appropriations panel vice chair ken Batangas Rep. Leandro Leviste a sumagmamano a miyembro ti team ni Department of Public Works and Highways (DPWH) Secretary Vince Dizon ken dagiti kontraktor wenno adda ti koneksyon na kadagiti kontraktor a karaman iti flood control anomaly.
Inbatad ni Rep. Leviste a naala na ti impormasyon manipod iti sumagmamano a kakadwan na iti kamara de representantes.
Kuna na a saan a ni Secretary Dizon ti mismo a kontraktor, no di ket dagiti tao na ken ado dagiti kameng iti kamara de representantes ti makaammo iti daytoy.
Ginutigot na ni Dizon nga ipublikar ti koneksyon ti team na kadagiti kontratista, kangrunaan na ket adda ti maisaysayangkat nga imbestigasyon kadagiti iregular a proyekto ti gobyerno.
Innayon ni Leviste a mabalin a makita iti simple nga online search dagiti akusasyon ti panagkunniber kontra iti sumagmamano a baro nga appointee ti Department of Public Works and Highways.
Inrakurak na pay nga adda ti potensyal ni Dizon a mangipatungpal ti reporma iti Department of Public Works and Highways no agbalin a silulukat iti isyu.
Immuna iti daytoy, kabayatan ti presscon ket nakaawat ti tawag ni Leviste manipod iti maysa a nangato nga opisyal ti Department of Public Works and Highways.
Inpetteng ti kogresista a ti kayatna ket transparency ken patas nga alokasyon ti pondo ken no adda ti koneksyon kadagiti kontratista ket masapol nga ipublikar.
Kabayatanna, maysa kadagiti kumontra iti pannakaipas iti2026 national budget ket ni Batangas 1st District Rep. Leandro Legarda Leviste, a nagpanawagan nga ipababa ti presyo dagiti proyekto ti Department of Public Works and Highways tapno maisardengen ti kickbacks.
Kas pagibasaran ket dinakamat ni Leviste ti rakurak ni dati a Department of Public Works and Highways Undersecretary Roberto Bernardo nga agarop “100%” ti bidding iti ahensya ket inawagan na kas “lutong-makaw”.
Inpetteng ni Leviste a masapol a kissayan ti 25% ti presyo iti proyekto ti Department of Public Works and Highways tapno maikkat ti mapatta-patta a ₱150 bilyon a kickbacks.
Kuna pay ni Leviste nga uray awan ti kickback ti maysa a kongresista, adda ti sabali a mairanud.
