LAOAG CITY – Nagpanawagan ni Batangas 1st District Rep. Leandro Leviste iti Kongreso a mangisayangkat ti imbestigasyon iti maipagarop a koneksyon ni Executive Secretary Ralph Recto ken Construction Workers Solidarity party-list Rep. Edwin Gardiola.
Segun ken ni Leviste, maipagarop a nangrugi ti panagatake kontra kenkuana kalpasan nga inimbestigaran na dagiti proyekto ti Department of Public Works and Highways (DPWH) iti Batangas ken dagiti kumpanya a maikonkonektar iti pamilya Gardiola.
Inpetteng ti agpanpanday linteg a masapol a tingitingen met ni Presidente Ferdinand Marcos Jr. no adda ti suporta ni Gardiola manipod iti uneg ti Malacañang, aglalo ita nga addan ti nangato a posisyon ni Recto iti gobyerno.
Kuna pay ni Leviste nga agkiddaw ti oras iti Kongreso tapno ibutaktak ti maipagarop a “modus” dagiti dua, kagiddan ti panangiburay na ti ladawan ti maysa a taripnong a kunana ket adda ti pakainaigan ti pulitika.
Kabayatanna, awan pay ti opisyal a rakurak da Recto ken Gardiola, nupay nagkomento ni Recto iti nasao a post ken inawagan na a “crazy” dagiti alegasyon ni Leviste.
