LAOAG CITY – Kinumpirmaran ni Batangas 1st District Representative Leandro Leviste a nagkiddaw daytoy iti Kamara de Representantes ti “travel authority” para kadagiti biahena kadagiti 20 a pagilian manipud inton Pebrero 8 agingga iti Hulio 26.
Karaman kadagiti pagilian a pagturongan ni Leviste ti United States, Hong Kong, Singapore, Indonesia, Cambodia, Timor-Leste, France, Germany, Belgium, the Netherlands, Italy, Switzerland, Austria, Portugal, Spain, Australia, the United Kingdom, China ken United Arab Emirates.
Gagem ni Leviste a bisitaen dagiti Filipino community kadagiti nadakamat a pagilian.
Inlawlawag ni Leviste a saan a dirdiretso nga adda isuna iti abroad iti uneg ti sumurok lima a bulan isu nga agbalin a present latta daytoy iti Kamara de Representantes nangruna no ipaayan isuna ti gundaway nga agsarita mainaig iti isyu.
Inbatadna a ti travel abroad ket kagiddan ti maipagarup a “request” dagiti sumagmamano nga “high-level representatives” ti administrasion Marcos Jr. a naidanon daytoy iti inana a ni Sen. Loren Legarda.
Innayonna a maipagarup nga adda ti agkalikagum a tumalaw isuna ditoy pagilian ken isardeng ti panangiparuk-at kadagiti ebidensia a maikonkonektar kadagiti opisial ti gobierno kadagiti maanomalya a proyekto ti Department of Public Works and Highways (DPWH).
