LAOAG CITY – Nagballaag ni Davao City 1st District Rep. Paolo Duterte kadagiti kakadwa na iti kamara de representantes kontra iti panangsuporta da iti possible a sabalin manen nga impeachment complaint kontra iti kabsat na a ni Vice President Sara Duterte, a manamnama a maipila intono Pebrero 2026.
Segun ken ni Rep. Duterte, sumagmamano laeng nga addaan ti kontrol iti pondo ken impluwensiya ti mangilunglungalong iti impeachment, ken saan a maibasar iti boses ti umili.
Inpetteng na a ti Pilipinas ket maysa a representative democracy, no sadinno a rumbeng a konsultaren nga umuna dagiti agpanpanday linteg dagiti masakupan da.
Innayon na a ti impeachment ket masapol a nakabasar iti pagsungsungbatan ken saan nga iti politika wenno patronage.
Maipalagip nga idi Pebrero 2025, na-impeach ni Vice President Duterte iti maikapat a reklamo mainaig iti maipagarop a saan nga usto ti nakausaran ti confidential funds ken dagiti pangta kontra iti presidente ken dadduma pay nga opisyal.
Pinirmaand ti 215 manipod iti 306 nga agpanpanday linteg ken naipasa iti senado, ngem saan a nagbayag ket diniskwalipika ti Korte Suprema gapu ta maipagarop a naglabsing iti probisyon a maysa nga impeachment laeng iti kada tawen kontra iti maysa nga opisyal.
Adda paylaeng iti Korte Suprema ti mosyon para iti reconsideration nga inpila ti kamara de representantes.
Balbaliw a rimuar ti isyu ti baro nga impeachment gapu ta dandanin malpas ti one-year rule.
Possible nga iraman ditoy dagiti alegasyon ni Ramil Madriaga, a nangibaga a daytoy ket maipagarop a dati a bagman ni Vice President Duterte ken ti kampanya na idi 2022 ket pinondoan ti Philippine Offshore Gaming Operators (POGOs) ken drug lords.
Segun ken ni House Committee on Public Accounts Chair Terry Ridon, kasapulan nga umuna ti pormal nga imbestigasyon ti kamara de representantes tapno mapaneknekan dagiti alegasyon.
Kabayatanna, immunan nga inbatad ti Malacañang a saan a pakibiangan ni Presidente Ferdinand Marcos Jr. Iti aniaman a possible nga impeachment.
