LAOAG CITY – Nagballaag ni Davao City 1st District Rep. Paolo Duterte iti posibilidad a maulit iti 2026 national budget ti maipagarup a panagtakaw a napasamak iti 2025 budget.
Inbatad ni Duterte, nagtalinaed a nangato ti risgo a maulit manen ti maanomalya gapu ta agingga ita ket awan pay ti nakabalud a maibilang a mastermind wenno utek iti korapsion iti 2025 budget.
Gapu iti daytoy, inpetteng ti agpanpanday linteg nga awan ti mapasamak a pudno a reporma no paulit-ulit laeng ti kapada a klase ti maanomalya.
Mamati ni Duterte a marigatan a maisubli ti talek dagiti umili agingga nga agtaltalinaed nga awan ti pannusa dagiti karaman ken maipagarup nga agtultuloy a panangabuso iti pundo ti gobierno.
Kuna ti kongresista, no saan man a mabain dagiti maseknan, nasken koma a maasida kadagiti umili ken ipakat ti pudno a pannakaipataw ti dusa pakairamanan ti panangdalus iti proseso ti panangpasa ken pananggastos ti pundo.
