LAOAG CITY – Naglikudan ni Davao City Representative Paolo Duterte nga adda dagiti ghost flood control projects iti distritona.
Daytoy ket kalpasan ti panangirakurak ni House Deputy Minority Leader ken ACT Teachers party-list Representative Antonio Tinio nga ado kadagiti flood control projects na ket maanomalya.
Segun kenni Duterte, naipatungpal ti tunggal maysa kadagiti flood control projects na idiay Davao ken iti Karayan Matina.
Mismo a ti Department of Public Works and Highways (DPWH) ken ti Commission on Audit (COA) ti nangisayangkat iti inspeksion ken validation iti nasao a proyekto.
Inakusaranna ni Tinio nga agbirbirok iti atension babaen ti panangiwarasna iti kinaulbod.
Maipalagip nga inbatad ni Tinio nga adda ti 121 a kontrata manipud 2019 agingga 2022 basar iti official data manipud iti website ti Sumbong sa Pangulo nga adda ti anomalia na.
Umabot iti P4.35 billion ti nadakamat a gastos iti flood control iti umuna a distrito ti ciudad ti Davao.
