LAOAG CITY – Ginutigot ni Cagayan De Oro Second District Representative Rufus Rodriguez ni Presidente Bongbong Marcos a pirmaan nan ti nailungalong a gakat a mangpatibker iti posisyon ti Pilipinas kontra iti agresibo nga aktibidad ti China iti West Philippine Sea.
Daytoy ket iti baet ti kumarkaro a tensyon iti nagbaetan ti Pilipinas ken China seknan iti paggiinagawan a teritoryo ken ti agtultuloy a pannakibibiang da iti 200-mile exclusive economic zone ti pagilian.
Malaksid pay daytoy iti inparuk-at a regulasyon ti China a mangibilbilin iti Coast Guard nga ibalud dagiti gangannaet a “trespassing” iti West Philippine Sea.
Segun ken ni Rodriguez, papigsaen ti Philippine Maritime Zones Bill ti takder ti pagilian iti maritime ken sovereign rights iti West Philippine Sea ken iti exclusive economic zone, ken paigetan ti enforcement ti defense-military forces iti karbengan ti Pilipinas.
Ti pannakapagbalin a linteg ti gakat ket maiyataday iti international laws, dagiti katulagan ken conventions, karaman ti United Nations Convention on the Law of the Sea (UNCLOS) ken ti 2016 arbitral ruling a mangibasbasura iti nalawa a panangtagtagikua ti Beijing iti South China Sea.
Inkalintegan pay ti kongresista a palpalubusan ti United Nations Convention on the Law of the Sea dagiti pagilian a mangestablisar ti bukod da a maritime boundaries.
