LAOAG CITY – Naiget a naglikudan ni Ako Bicol Partylist Rep. Zaldy Co dagiti maibakbakal nga alegasion kontra kenkuana iti panagdengngeg ti Senate Blue Ribbon Committee mainaig iti maanomalya a flood control projects.
Iti maysa a mensahe a naipatulod kadagiti media, inawagan ni Representive Co nga inuulbod ken awan ti panangibasaran kadagiti nasao nga alegasion.
Inpettengna a sungbatanna dagiti nasao nga isyu iti husto a panawen ken umiso a forum.
Agdama nga adda idiay Amerika ni Co tapno dumalan iti maysa a medical check-up.
Inbatad met ni Ako Bicol Partylist Rep. second nominee Rep. Alfredo Garbin nga addan ti dua a lawasen a saanna a nakasarsarita ti padana a kongresista a ni Rep. Co.
Kuna ni Garbin, nadakamat ni Co nga adda daytoy idiay Estados Unidos para iti maysa a medical check-up inton bigat, Septiembre 24.
Inlawlawag ni Garbin a saan nga otorisado isuna nga agsarita para ken ni Co.
Kunana a dagiti abugado ni Co ti agsarita mainaig kadagiti alegasion.
Inpaganetgetna a saan a karaman ti Ako Bicol Party-list iti aniaman nga ilegal nga aktibidad.
Inadmitir ni Garbin a masaksaktan isuda kadagiti mapaspasamak ngem saanda nga agpaapektar ken agtultuloy latta ti panagtrabahoda.
