LAOAG CITY – Addan ti agarup dua a dekadan a mailiblibot ti replica ti Itim na Nazareno iti Brgy. 2, Sta. Joaquina ditoy siudad ti Laoag.
Segun ken ni Mrs. Minda Jacinto, akinkukua ti replica ti Itim na Nazareno, dakkel ti pammatina a gapu iti Itim na Nazareno ket nagimbag isuna iti sakitna a kanser ken nagsardeng ti panag-dialysis-na.
Gapu iti daytoy, inbatadna a nagbalinen a tradision kenkuana ti tinawen a pannakaisayangkat ti translacion ti Itim na Nazareno.
Kunana nga ala una ti malem inton Enero 9 ket maiyuswat ti misa para iti Itim na Nazareno ken iti alas tres ti malem iti nasao met laeng nga aldaw ket maiwayat ti prosision.
Inlawlawagna a mailibot ti replica ti Itim na Nazareno manipud mismo iti naipasdek a Chapel iti pagtaeganda ket rumuar daytoy a dumalyasat iti P. Gomez Street, magna iti paset ti Bacarra Road, lumabas iti Kapitolio Probinsial, dumagas iti Laoag City Hall agingga nga agsubli iti pagtaenganda iti Barangay 2.
Innayonna nga adda pay dagiti deboto manipud iti sabali a lugar kas iti Isabela, Cagayan ken Cavite a makipaset iti nasao nga aktibidad.
