LAOAG CITY – Naragsak nga inpakaammo ni Mrs. Minda Jacinto, agtagikua ti replica ti itim na Nazareno iti Barangay 2, Sta. Joaquina ditoy siudad ti Laoag a mailibot ti nasao a replica kadagiti nagduduma a paset iti sentro ditoy siudad.
Segun kenkuana, mailibot ti replica ti itim na Nazareno manipod mismo iti naipasdek a Chapel iti pagtaeganda ket rumuar daytoy a dumalyasat iti P. Gomez Street, magna iti paset ti Bacarra Road, lumabas iti Kapitolyo Probinsial, dumagas iti Laoag City Hall agingga nga agsubli iti pagtaenganda iti Barangay 2.
Inbatadna nga adda ti maiyuswat nga healing prayer ita a malem idinto nga adda ti maisayangkat a misa inton bigat iti oras ti alas tres ti malem ken kalpasanna ket mairuaren ken mailibot ti replica ti itim na Nazareno.
Kunana nga adda pay dagiti deboto manipod iti sabali a lugar kas iti Isabela, Cagayan ken Cavite a makipaset iti nasao nga aktibidad.
Inlawlawagna a manamnama nga umabot iti 600 agingga 700 a deboto ti agatendar iti pannakaisayangkat ti prosisyon.
Kabayatanna, naammoan nga addan ti 20 a tawen a maiyus-uswat ti prosisyon ti itim na Nazareno.
