LAOAG CITY – Inpanakkel ti Philippine National Police (PNP) dagiti nagbalin nga addang da iti internal cleansing ken naiget a recruitment kontra kadagiti “ninja cops”, wenno dagiti pulis a mangal-ala ti paset ti ilegal a droga tapno ipalako.
Inpetteng ni Philippine National Police Chief Gen. Jose Melencio Nartatez Jr. nga ad-adda pay a pinatibker ti nailian a pulisya ti commitment na a dagiti ninja cops ket awan ti lugar da iti organisasyon.
Segun ken ni Nartatez, nangipila dan ti kaso ken naikkaten iti serbisyo dagiti maibilang kas ninja cops.
Inbatad daytoy ni Nartatez kalpasan ti rakurak ni Department of the Interior and Local Government secretary Jonvic Remulla a pannakadadael ti P4.56-bilyon a balor ti illegal a droga iti Cavite, a basar kenkuana ket nakissayan ti drug recycling iti babaen ti administrasyon ni Presidente Ferdinand Marcos Jr.
Nagballaag ni Nartatez kadagiti police officers a daytoy ti agserbi a ballaag kadakuada nga amin a ninja cops ket maikkat iti serbisyo.
