LAOAG CITY – Inpetteng ni Northern Samar Representative Paul Daza a kasapulan a mareporma ti radio-frequency identification (RFID) ken toll system ditoy pagilian tapno saan nga agbalin a kanayonan a pakadagsenan dagiti motorista.
Iti budget deliberation ti Department of Transportation (DOTr), kinuna ni Daza a saan nga agbalin nga “anti-people” ti teknolohia, no sadinno dagiti umili ket maipasango iti nainget a multa ken dusa gapu kadagiti biddut bayat a natalged dagiti expressway concessionaires iti kinapalpakda.
Inaramid ni Daza ti statement idi inruar ti Toll Regulatory Board (TRB) ti narebisar nga expressway guidelines, a pakairamanan ti multa no awan ti valid RFID ken load balance dagiti motorista nga epektibo inton Oktubre 1.
Inpaganetget ti mammanday-linteg a nupay naitantan ti orihinal a pannakaipatungpal idi Agosto1, saan latta nga umdas no dagiti mismo expressway concessionaires ket awan ti umno a sistema ti panagkolekta iti toll.
Kinunana, rumbeng nga agsungbat dagiti concessionaires maibsar kadagiti “key performance indicators” nga inkeddeng ti Toll Regulatory Board.
Kinuna ti mammanday-linteg, masapul nga adda “clear formula” no kasano a masungbatan dagiti tollways maibasar iti performance-da.
Kabayatanna, inpasigurado ni Toll Regulatoey Board Executive Director Alvin Carullo a nadagdagsen ti dusa ken multa kadagiti toll concessionaires no idasig kadagiti motorista.
