LAOAG CITY – Napatawan manen ti 60-day suspension ni Cavite 4th District Representative Kiko Barzaga babaen ti panangadapatar ti kamara de representatives ti rekomendasion ti Committee on Ethics and Privileges.
Kabayatan ti plenary session, binasa ni House committee on ethics and privileges chairperson ken 4Ps party-list Rep. JC Abalos ti report iti privilege speeches ti National Unity Party (NUP) members a da Negros Occidental Rep. Jeffrey Ferrer ken Manila Rep. Rolando Valeriano mainaig iti inpost ni Barzaga iti social media.
Inakusaran ni Barzaga dagiti miembro ti National Unity Party a nagawat ti pasuksuk manipod iti business tycoon a ni Enrique Razon Jr. iti panangsuporta da ken ni dati nga House Speaker Ferdinand Martin Romualdez kabayatan ti speakership race.
Kuna pay ni Barzaga a pagayatan ti Diyos ti ipupusay ni dati nga Antipolo Rep. Romeo Acop tapno saanen nga agpaot ti panagkurakot na.
Segun ken ni Abalos, naduktalan ti komite a ti nagbalin nga addang ni Barzaga ket nalabsing na ti isu metlaeng a grounds a nakasuspensoan na idi Disyembre 1, mainaig iti panaglabsing na ti Section 141(a), Rule 20 ti pagannurutan ti kamara de representantes ken ti Section 4(c) ti Republic Act 6713 wenno ti Code of Conduct and Ethical Standards for Public Officials and Employees.
