LAOAG CITY – Maiyimplementar ti rerouting iti ili ti San Nicolas iti Disiembre 26, 2024, gapu iti pannakaisayangkat ti grand parade kas paset ti pannakaselebrar ti peista iti nasao nga ili.
Segun ken ni P/Cpt. Randy Damo, Hepe ti San Nicolas Municipal Police Station, mausar ti national highway kas parade route, rason nga addanto ti alternatibo a ruta dagiti motorista.
Mainaig iti daytoy, kunana a dagiti agturong iti siudad ti Batac ket dumalyasat dagitoy iti Barangay 2 ken sumalpot wenno rummuar iti Barangay 14 agingga iti Nalundasan Road sakbay nga ag-left turn a rummuar iti high way.
Dagiti long vehicle bus nga agturong iti siudad ti Batac ket dumalayasat da iti diversion road ken iti rabaw ti dike agingga a rummuarda iti Nangalisan wenno ti dakkel a masarakan a mall iti ili ti San Nicolas,
Innayonna a kasta met dagiti naggapo iti siudad ti Batac nga agturong iti ili ti Dingras, ken kasta met ti ruta dagiti naggapo iti ti Sarrat ken Dingras nga agturong ditoy siudad ti Laoag ken dakkel a mall iti ili ti San Nicolas.
Kabayatanna, ti nadakamat a rerouting ket agngudo agingga a malpas ti Dance ken Grand Parade inton Disiembre 27, 2024.
