LAOAG CITY – Binigbig ni Gov. Matthew Marcos Manotoc ti ar-aramiden ti Provincial Disaster Risk Reduction Management and Resiliency Council a panagsagana kadagiti sumangbay a kalamidad ken didigra kas iti panangisayangkat ti Rescue Olympics.
Nagyaman ti gobernador iti tulong da Congressman Ferdinand Alexander Sandro Marcos ken ni Cong. Angelo Marcos Barba iti nasao nga aktibidad gapu ta balligi a naisayangkat daytoy.
Inbatadna a nupay napasnek ti panagkarkararag ti tunggal maysa a maiyadayo ti probinsia iti ania man a dakes a pasamak a pakairamanan ti kalamidad ken didigra ket nasken iti panagsagsagana nangnangruna kadagitoy a gundaway nga adda posibilidad nga agpaut ti “La Niña” agingga iti umuna a quarter ti tawen 2025.
Kiniddawna kadagiti amin a City ken Municipal Disaster Risk Reduction and Management Offices ti probinsia nga agkaykaysa nga agtrabaho tapno maliklikan ti kaadda ti mairisgo a biag wenno sanikua gapu iti bagyo.
Ginutigot ti gobernador dagitoy a mangtingiting no ania dagiti kurang a kagamitan kadagiti bukodda a lugar.
Patien ti gobernador nga ado dagiti kurang a kagamitan isu a masapul makita dagitoy tapno makapagkiddaw ti probinsia kadagiti maseknan nga ahensia kas iti Office of Civil Defense ken iti Department of Interior and Local Government pakairamanan dagiti dua a diputado ti probinsia a ni Senador Imee Marcos ken ni Pres. Ferdinand R. Marcos Jr.
Kunana a kasapulan dagiti umiso a kagamitan ken makinaria no sadinno dagiti eksperto ti mangoperar kadagitoy ken kangrunaanna ti napintas a koordinasyon para iti alisto a panagresponde iti ania man nga insidente.
Innayonna nga agtultuloy ti pannakapasayaat ti abilidad dagiti rescue personnel a mangisayangkat ti “search and rescue operation” ditoy probinsia.
