LAOAG CITY – Natupakan ti maysa kadagiti rescue vehicle ti Provincial Disaster Risk Reduction and Management Office kalpasan a natulid ti puon ti kayo ti niog iti sango ti Kapitolio Probinsial.
Daytoy ket gapu pay laeng ti epekto iti iduduprak ti Bagyo Marce ditoy probinsia no sadinno a nagpatpatnag ti napigsa nga angin a buyugan ti nakapsot agingga pumigsa a tudo.
Gapu iti daytoy, nadadael ti nasao a rescue vehicle kalpasan a nabuong ti sangona ken nakuppit daytoy.
Kabayatanna, inpakaammo ni Mr. Marcell Tabije, mangidadaulo ti Provincial Disaster Risk Reduction and Management Office nga adda ti sumurok sangaribu nga indibidual ti naibakwit kadagiti evacuation center manipud kadagiti nagduduma nga ili ken siudad ditoy probinsia.
Inlawlawagna a dagiti residente a nagibakwit ket manipud iti ili ti Pagudpud, Bacarra, Bangui, Banna, Carasi, Dingras, Dumalneg, Piddig, Pinili, San Nicolas, Sarrat, iti siudad ti Batac ken ditoy siudad ti Laoag.
Kunana a naiget met ti ballaagda kadagiti residente nga agnanaed iti asideg kadagiti kabaybayan pakairamanan dagiti mangngalap.
Inbatadna nga ikarkarigatanda nga isubli dagus ti pannakapukaw ti serbisio ti kuriente babaen iti pannakibinnuligda iti Ilocos Norte Electric Cooperative.
Innayonna nga adda dagiti nadadael iti benneg ti agrikultura ken imprastraktura ngem manarimaan pay laeng ti pannaka-consolidate-na.
