LAOAG CITY – Agtultuloy ti panagsawar dagiti rescuers idiay Indonesia tapno biruken ti agarop 400 a tattao a mapukpukaw kalpasan ti nalawa a layos ken landslides iti nadakamat a pagilian.
Patien ti kaadoan a nagaburan dagiti mapukpukaw manipod kadagiti panagreggaay ti daga kalpasan ti awan sarday a panagtudtudo na a nangitunda pay ti layos.
Basar iti gobierno, nanayunan pay ti bilang dagiti nairekord a natay iti isla ti Sumatra nga iti agdama ket umaboten iti 440.
Adda metten dagiti naipatulod a tulong kadagiti residente a naapektaran ti kalamidad.
Nupay kasta, rumrumuar nga adda paylaeng dagiti saan a nakaawat ti tulong isut gapuna nga adda dagiti report mainaig iti panagtaktakaw ti taraon ken danom dagiti dadduma a residente tapno makalasat dagitoy manipod iti paspasaren da a nakaro a bisin.
Maipalagip a napasamak ti nalawa a layos ken landslides iti paset ti Thailand, Malaysia, Indonesia ken Sri Lanka kalpasan ti sumagmamano nga aldaw a pinagtudtudo na ti napigsa a gubuay ti nagsasaruno a bagyo.
