LAOAG CITY – Inalerto dagiti otoridad dagiti umili iti sumagmamano a paset ti estado ti Hawaii gapu iti dakes a tiempo kalpasan ti pannakaselebrar ti kaaldawan ti paskua.
Segun kenni Bombo International Correspondent Manny Pascua idiay Hawaii, nakaawat dagiti residente iti isla ti Kawaii iti flashflood warning gapu ti mapaspasar da a dakes ti panawen.
Nabalakadan nga agsagana dagiti residente iti anyaman a mapasamak iti lugar da.
Mainaig iti daytoy, kuna ni Pascua a nakaawat met dagiti umili iti Maui iti brown water warning iti baybay.
Inbatad na a nagpukaw met ti suplay ti kuryente iti Honolulu ken naapektaran dagiti rinib-ribo a residente.
Nagpukaw ti kuryente gapu ti kinapigsa ti angin ken adda dagiti natumba a kayo iti nasao a lugar.
Innayon ni Pascua a saan met a nakanselar dagiti flight nupay napigsa ti angin.
