LAOAG CITY – Insegida nga agawid dagiti residente ti siudad ti Marawi a nagnaed ditoy probinsya apaman a makaawat da ti tawag manipud iti lokal a gobyerno ti Marawi nga agsubli dan.
Daytoy ti inbatad ni Mr. Haji Akmad Aduma, presidente ti Muslim Association ti Ilocos Norte.
Kuna na a masapul nga agsubli dagiti residente tapno inda kitaen ti lugar no adda pay dagiti nabat-bati a sanikua da.
Segun kenni Aduma, iyur-uray da ti tawag ti lokal a gobyerno ti Marawi tapno agsubli dan.
Inbatad na nga iyur-uray dagiti taga Marawi City ti naan-anay a rehabilitasyon sakbay da a makasubli iti bukod da a lugar.
Naamuan nga umabot ti nasurok 10 a pamilya dagiti agnanaed ditoy probinsya sipud idi rimsua ti gubat iti nasao a siudad.
