LAOAG CITY – Pinalubusan dagiti kameng ti Hawaii Police Department ken Hawaii National Guard dagiti residente a makasubli iti balay da bayat nga agtultuloy ti panagpuswak ti lava manipud iti daga idiay Leilani Subdivision, Puna District, Big Island, Hawaii.
Daytoy ti inpakaammo ni International Bombo Correspondent Manny Pascua iti pannakiuman ti Bombo Radyo Laoag.
Kuna ni Pascua a no kasapulan dagiti residente ti agsubli iti balay da gapu ta addan ti nalipatan da nga importante a dokumento ket kaduwaen isuda dagiti otoridad kangrunaan dagiti kameng ti Hawaii National Guard.
Segun kenkuana, uray dagiti aso wenno pusa a nabati iti balay ket nasken nga isalakan dagiti agtagikua gapu ta napateg kadakuada ti biag dagiti ayop.
Immunan nga inpakaammo ni Pascua a naipatungpal ti danger zone idiay Pahoa Town a sakop ti Puna District bayat a dumegdegdeg ti sitwasyon gapu ti panagpuswak ti lava iti nasao a lugar.
Iti agdama, umaboten ti 35 nga istruktura ken balay ti nadadael gapu ti Kilauea volcano eruption.
