LAOAG CITY – Inlawlawag ni Police Captain Chris Anthony Sorsano, ti chief of police ti PNP-Solsona a saan a makaskastrek dagiti residente iti Barangay Namaltugan, Calanasan, Apayao.
Sungbat daytoy ni Sorsano iti naipadanon a report iti Bombo Radyo nga adda dagiti taga Barangay Namaltugan a bumaba ken mapan da aggatang iti ili ti Solsona.
Segun kenni Sorsano, no bumaba dagiti maseknan ket agpatingga da laeng iti boundary ken saan da a sumrek iti chekpoint gapo ta adda ti pagtaltalkan dagitoy a pangiyawatan da ti kwarta da nga isu met ti mapan gumatang kadagiti kasapulan dagitoy.
Inpetteng na a paset pay laeng iti probinsya ti Apayao ti pagtalinaedan dagiti maseknan bayat nga ur-urayen da dagiti inpagatang da.
Inbatad ni Sorsano a binagaan na dagiti pulis iti checkpoint a no adda man ti ited ti lokal a gobierno ti Calanasan a quarantine pass ket masapol nga ipresentar dagitoy.
Kunana pay a no maawat wenno maala laketdin dagiti taga-Calanasan dagiti inpagatang da ket dagus da met nga agawid.
Mainaig iti daytoy, inpasingked ni Sorsano a paigetan da ti panagbantay ken kasarita da dagiti maseknan a saan da unay nga ado a bumaba tapno maliklikan ti panagamak dagiti residente iti nasao nga ili.
