LAOAG CITY – Inrakurak ni Samuel Guerrero, iti California, USA, nga adu a tattao ti mangayat kenni Presidente Donald Trump gapu kadagiti naaramidan na sakbay ken iti panagserbi na a presidente iti Estados Unidos.
Kuna na a maysan ti pannakapapintas ti ekonomiya ti Amerika iti baet ti COVID-19 pandemic.
Segun kenni Guerrero, pakaseknan laeng iti maipagarup a saan a napintas ti panangmaniher ni Trump ti COVID-19 pandemic ti maibatbato kenkuana.
Inbatad na a no bilang ni Joe Biden ti nakatugaw a presidente ket pakaseknan iti pannakailockdown ti Amerika tapno maipababa ti kaso ti COVID-19 ngem awan dagiti plano na a maingato met ti ekonomiya.
Dinayaw ni Guerrero iti addang ni Trump a pannakaipan ti borderwall iti Estados Unidos para iti seguridad dagiti umili.
Kabayatanna, inrakurak ni Guerrero nga adun dagiti residente iti California ti agkalikagum a persona nga agbotos iti sakbay ken iti kaaldawan ti eleksiyon gapu ti panagamak da a maswitik ti botos babaen iti Mail Voting.
Mangrugi intono Oktubre 30 ti personal a panagbotos agpatingga intono Nobyembre 3 a kaaldawan ti eleksiyon.
