LAOAG CITY – Inpeksa ni Mr. Lance Tagalicud a residente iti Brgy. Espiritu iti ili ti Dingras ti sakit ti nakemna kalpasan a maipagarup a dinangran isuna ni Brgy. Chairman Walter Villator iti nasao a barangay.
Segun kenkuana, apaman nga agturong daytoy nga agawid iti pagtaenganda ket nakaisawang daytoy ti sarita a “hey!!!” iti anak ti nasao a Kapitan nga adda iti maysa a kubo-kubo iti tiangge.
Nupay kasta, inpalgakna a kumarit metten ti baro ti Kapitan kenkuana ngem saanna nga ingkankano gapu ta naub-ubing daytoy kenkuana.
Inlawlawagna nga idi mumalem ket apaman nga agawid daytoyen iti pagtaenganda a nakamotorsiklo manipod iti Brgy. Bacsil iti nasao nga ili ket ditoy a sinada isuna ni Brgy. Chairman Villator kaduana ti kabsat ti Kapitan.
Kunana nga awan ti ammona a nakabasolanna isu a nakigtot daytoy no apay napasamak kenkuana ti pannakakabkabil.
Gapu iti daytoy, kunana a dinanogda isuna iti likud ti ulona agingga a nagtartaray daytoy gapu ta nakaad-aduda ti mangdangran kenkuanan.
Inpalgakna nga apaman a mapanda nga agpamedikal ket sinadada isuda ken kinaritda pay ti manongna ngem saanda lattan a simmubbot.
Mainaig iti daytoy, inpetteng ni Brgy. Chairman Walter Villator iti Brgy. Espiritu iti ili ti Dingras a saanna pulos a naasitgan ken dinangdangran ni Lance.
Kunana nga ingawgawidda ti kabsatna gapu ta kayatna a makasarita ni Lance tapno mailawlawag daytoy namunganayan ti saan a panagkikinnaawatan da Lance ken ti baro ti Kapitan.
Inlawlawagna a maibasar iti rekordda iti barangay ket adun dagiti nakairamramanan ni Lance kas idi kangitingitan ti pandemia a kinamkamatda pay nga opisial ti barangay isuna kaduana dagiti barkadana gapu iti panagruruar a saan met a napateg ti panggepda.
Innayonna a kalikagumda a mapatawan ti pannusa ni Lance ngem kankanayon nga agpakpakaasi ti lolana kadakuada.
