LAOAG CITY – Inpeksa ni Mr. Martin Benito, residente ti Brgy. Mangitayag iti ili ti Piddig ti sakit iti nakemna kalpasan a saan nga inraman ti Day Care Worker a ni Ms. Stephanie Agustin ti naganna para iti Cash for Work program.
Segun ken ni Benito, nakigtot daytoy idi naammoanna nga awan ti naganna iti listaan idi mangrugi dagitoyen nga agtrabaho para iti nasao a programa nga immunan a nairaman ti naganna iti listaan a naikabil pay iti group chat-da.
Inbatadna a patienna a rinanta ti Day Care Worker nga inikkat ti naganna iti listaan kalpasan nga adda dagiti sumagmamano a banag a saanda a nagkinnaawatan iti kallabes.
Inpalgakna a napaneknekanna daytoy idi dinakamat ti Day Care Worker nga amin a makagurgura kenkuana ket saan a makaawat ti ayuda banag nga isu ti pagsakitan ti nakemna.
Inlawlawagna nga idi Marso 18 ket adu dagiti nakakita nga adda dagiti kabagianna a maipagarup a nagawat ti pay out.
Kunana a rumrummuar nga adda dagiti gundaway a maipagarup a pineke ti maseknan a Day Care Worker dagiti pirma tapno laeng makaawat ti ayuda dagiti tattao.
Mainaig iti daytoy, kuna ni Mr. Benito a masapol nga agsungbat ti Day Care Worker maipanggeop daytoy a maibatbato nga isyu kenkuana.
Innayonna a gapu iti gura ti Day Care Worker kenkuana ket pinagsaosaoan isuna iti sangoanan ti adu a tattao nga arig napabainan pay daytoy.
Kabayatanna, inbatad ni Brgy. Chairman Edmund Agustin iti nasao a barangay nga inpagarupna a nalpasen ti problema ni Benito isu a saanen a nangaramid ti simmaruno a tignay maipanggep ti reklamona.
Inadmitirna nga adda dagiti maidandanon kenkuana a reklamo pakaseknan iti maipagarup nga adda dagiti indibidual a saan nga agtartrabaho ngem agsusueldo met dagitoy.
Nupay kasta, saanna metten nga inlawlawag ti ad-adu pay a detalye iti nasao a banag.
Iti agdama, bayat a maisursurat daytoy a damag ket ikarkarigatan ti News Team ti Bombo Radyo Laoag nga alaen ti takder ti maseknan a Day Care Worker maipapan iti daytoy a banag.
