LAOAG CITY – Inpakaammo ni Ms. Chariz Garma, mangidadaulo ti Department of the Interior and Local Government ditoy siudad ti Laoag a no ag-resign ti maysa a Sangguniang Kabataan wenno SK official ket nasken a maipaima ti Resignation Letter daytoy iti Local Chief Executive.
Segun kenkuana, daytoy ket kalpasan nga adda dagiti sumagmamano a Sangguniang Kabataan officials ti nag-resign kadagiti nagduduma a barangay ditoy siudad no sadinno nga inpasada ti Resignation Letter dagitoy kadagiti Barangay Chairman-da.
Inbatadna a saan a mabigbig ti pormal a panag-resign dagiti Sangguniang Kabataan officials no iti biang ti Kapitan ti barangayda ti nangipasaanda ti Resignation Letter-da.
Kabayatanna, inlawlawag ni Garma nga addan ti inyetnag a pagannurotan ti National Youth Commission a suroten ti Sangguniang Kabataan tapno malitopan dagiti nabakantean a posision ditoy siudad ti Laoag.
Kunana nga addan ti inpaayna a kopya iti Sangguniang Kabataan Federated President ditoy siudad ti Laoag a manamnama a mapagsasaritaanda no ania dagiti umiso ken rumbeng nga aramidenda tapno insigida a malitopan dagiti nabati a posision.
Innayonna nga iti agdama ket manarimaan ti panangalada kadagiti datos no mano amin ti bilang dagiti nag-resign a Sangguniang Kabataan officials iti intero a siudad ti Laoag.
Naammoan a dagiti kangrunaan a rason iti panagikkat dagiti Sangguniang Kabataan officials ket gapu iti napinpintas nga oportunidad ken panagturong iti ballasiw taaw.
