LAOAG CITY – Naipasan ti resolusion iti pannakaestablisar ti Laoag City National High School iti paset ti amianan a daya ditoy siudad ti Laoag.
Iti babaen ti inpasa ni Sangguniang Panlungsod Member Bjorn Lao, ti Chairman ti Committe on Education and Culture a naaprobaranen ti pannakaestablisar ti nasao a pasdek pagadalan.
Kunana a basar iti inyuswatda a survey idi tawen 2022 a nakipartisiparan dagiti nagturposen iti panagadal ken nagadal iti Ilocos Norte National High School (INNHS) ken Ilocos Norte College Arts and Trades (INCAT) a rumrumuar a kasapulan ti ti insigida a panagkissay ti populasion iti dua a pagadalan.
Mainaig iti daytoy, rumrumuar a makatulong ti kanayonan a pagadalan tapno malappedan ti nakaro a traffic no rush hour, makissayan ti travel distance dagiti agad-adal, ken makissayan ti overcrowded a classrooms.
Nupay kasta, adda pagalagadan a kasapulan a suroten tapno makaestablisar ti secondary high school no sadinno a kasapulan ti 100 nga enrollees iti maysa wenno ad-ado pay a grade level.
Gapu iti daytoy, nangiyuswatda manen ti sabali pay a survey ket rimuar nga 82% ti umanamong a kayatda ti ag-enroll iti baro a pagadalan no sadinno a dagitoy ket manipud Barangay 23 San Matias (Poblacion) agingga Barangay 29 Santo Tomas (Poblacion).
Ti nasao a pagadalan ket maipatakder iti Barangay 28, San Bernabe ditoy siudad ti Laoag.
