LAOAG CITY – Kasapulan a mabalbaliwan ti resolusion nga ilunglungalong ni Sangguniang Panlalawigan Member RJ Fariñas mainaig iti pannakaestablisar ti eropuerto iti ili ti Pagudpud.
Daytoy ti rekomendasion ti Chairman ti Public Works a ni Bokal Marlon Sales iti Sangguniang Panlalawigan gapu ta daytoy ti inrekomendar met ni Civil Aviation Authority Manager Ronald Estabillo.
Inbatadna a masapul a ti resolusion ket naglaon ti panagkiddaw ti Department of Transportation a mapundoan daytoy a proyekto ngem masapul pay laeng nga adda ti maisayangkat a technical study no mabalin kadi ti mangestablisar ti eropuerto.
Inlawlawagna a kasapulan ti tech study tapno mapundoan gapu ta saan a mabalin no awan dagiti supporting documents.
Nupay kasta, inbatad ni Bokal Fariñas a ti dakdakamaten ni Sales a resolusion ket kayatna a saoen nga addan ti construction ngem ti resolusion ni Fariñas ket ti pay laeng pannakaipalubos ti nasao a proyekto wenno panangikonsiderar ni Presidente Ferdinand Marcos Jr. ti eropuerto.
Innayonna a sakbay a mangilungalong ti maysa nga ahensia ket masapul nga adda ti mailatang a pundo.
