LAOAG CITY – Inaprubaran ti Sannguniang Panlungsod ditoy siudad ti Laoag ti resolusyon a mangirekomendar iti kongreso ti kalikagum a pannakabaliw ti nagan ti Buttong Elementary School ken mapagbalin a Buttong Integrated School.
Daytoy ket kalpasan nga adda ti nagbalin a diskusyon iti nagbaetan ti konseho ken schools division of Laoag kabayatan ti sesyon.
Segun ken ni Mrs. Vilma Eda, ti schools division superintendent iti DepEd Laoag, namunganay ti pannakakiddaw ti panagbaliw ti nagan ti Buttong Elem. School tapno maakomadar dagiti Junior High School Students.
Inbatad na a naruay dagiti estudyante nga agad-adal ditoy siudad nangruna kadagiti pagadalan iti sentro rason a dakkel a tulong kadagiti nagannak nga asideg iti Buttong Elem. School ti pannakasukat ti nagan ti pagadalan.
Kuna na a daytoy ket immuna a nakiddaw babaen iti oridansa ngem masapol a mapagbalin a resolusyon manipod iti konseho.
Gapu iti daytoy, inbatad ni Atty. Jayson Perera a dagus a napagbalin a resolusyon ti immunan nga ordinansa ti DepEd Laoag.
Nu pay kasta, inlawlawag na a sakbay a napagbalin a resolusyon daytoy ket dita nga adda ti nagbalin a diskusyon agsipod ta ti kidkiddawen ti DepEd Laoag ket ti konseho ti mangaprubar ti pannakasukat ti nagan iti Buttong Elem. School, banag nga awan ti karbengan ti konseho a mangaramid.
Kabayatanna, kuna ni Eda a mabalin a maipasa ti resolusyon iti DepEd Regional Office ken maaprubaran iti kabiitan a panawen.
