LAOAG CITY – Manamnama a talantanen ti Sangguniang Panlalawigan ti maysa a resolusyon mangkidkiddaw kadagiti pribado ken pampubliko nga ospital a mangiyisyu ti free medical certificates para iti medico-legal cases inton tawen 2023.
Segun ken ni Sangguniang Panlalawigan Member Dr. Medeldorf Gaoat, Chairman ti Committee on Health, daytoy ket tapno maadal a naimbag daytoy a nailungalong a gakat a pakabenepisiaran dagiti umili ditoy probinsia nangruna kadagiti agkasapulan ti nasao a medical certificate.
Inbatadna a gapu ta kasapulan ti naan-ananay a pannakaarisit ti nasao a gakat ket kinasapulan ti hunta probinsial a matalantan daytoy inton sumaruno a tawen gapu ta idi kalman ket maudi a Regular Session dagiti agpanpanday linteg para iti tawen 2022.
Nupay kasta, inpasiguradona a maiyuswat ti naig-iget a pannakatingiting daytoy a gakat ken ditoy a maidasar dagiti bukud a suhestion ken takder dagiti padana nga agpanpanday linteg pakairamanan dagiti maseknan iti daytoy a banag.
Kunana a malaksid pay kadagiti pribado ken pampubliko nga ospital ket karaman pay ditoy dagiti clinics ken medical establishment a legal nga agop-operar ken addaan ti lisensia dagitoy ti mangited ti libre a medical certificate para iti medico-legal cases wenno medico legal certificates.
Innayonna a nasken laeng a maidasar daytoy a naimbag gapu ta mamati daytoy a napintas ken adda ti pagsayaatanna no bilang mapatgan daytoy a panagkiddaw kadagiti maseknan nga ospital.
