LAOAG CITY – Inaprobaranen ti Sang. Panlalawigan ti resolusyon a mangsupsuporta House Bill No. 5066 wenno “Magna carta” for barangay nga inisponsoran ni Rep. King George Leandro Collantes iti District 3 ti Batangas.
Ti nasao a Magna Carta ket isu ti mangipaay kadagiti opisyal ti barangay ti husto a compensation, benefits, ken pammigbig.
Malaksid iti daytoy, nakaiyataday iti gakat ti panagbalin a regular nga empleado iti gobierno dagiti opisyal ti barangay.
Dagiti punong barangay ket agsweldo iti kas sweldo dagiti sangguniang bayan iti maysa nga ili, dagiti sangguniang barangay ket 80% iti sweldo ti Sang. Bayan ti maawatda.
Mainaig iti daytoy, patien ni Hon. Ryan John Pascua, Liga ng mg Barangay President ditoy probinsia ken sponsor ti nasao a resolusyon a karbengan dagiti opisyal ti barangay a makaawat kadagitoy a benepisyo.
Kunana a babaen iti daytoy a resolusyon a mangsupsuporta iti gakat ni Collantes ket ad-adda a mapatibker daytoy ken dakdakkel ti tiansa na nga agbalin a linteg.
